☢️ 26 красавіка — Чарнобыльскі шлях ад Вільні да Нью-Ёрку: Збіраем акцыі ва ўсім свеце на мапе dze.chat

Ужо на наступным тыдні будзе роўна 37 год з аварыі на ЧАЭС ад якой пацярпела незлічоная колькасць беларускіх сем’яў. Штогод 26 красавіка беларусы выходзяць на акцыю Чарнобыльскі шлях, якая сёлета мае яшчэ большую актуальнасць, бо: «НЕ ЯДЗЕРНАЙ ЗБРОI Ў БЕЛАРУСI».

Нацыянальная лідарка Святлана Ціханоўская заклікала беларусаў замежжа выйсці на Чарнобыльскі шлях 26 красавіка.

Ужо на дадзены момант вядома, што акцыі на 37-ю гадавіну трагедыі адбудуцца ў:

🇱🇹 Вільні — 18:00. Лукішская плошча.
🇵🇱 Варшаве — 18:00. Помнік Каперніку
🇩🇪 Берліне — 17:45. Mühlenstraße 70-71
🇨🇦 Таронта — 12:30. Ля Генконсульства РФ
🇺🇸 Нью-Ёрку — 12:30. Штаб-кватэра ААН

Усе акцыі на 26.04. у розных гарадах свету збіраюцца на мапе dze.chat. Заклікаем вас далучыцца да акцыі ў вашым горадзе ці арганізаваць яе самастойна. Інфармацыю, дзе і калі яшчэ адбудзецца Чарнобыльскі Шлях у гэтым годзе — дасылайце ў @dzechat_bot

Падрабязнасці распавядаем тут

@motolkohelp

❤️ Лацінка, тарашкевіца і нават арабіца: 7+ сэрвісаў, якія прадэманструюць моц і веліч беларускай мовы

Ну, і насамрэч, дапамогуць даведацца нешта новае ў гэтую сонечную нядзелю, ды, вядома, зрабіць level up вашых беларускамоўных скілоў.

🔴Пішам без памылак — спраўджваем правапіс

Сэрвіс «Добрапіс» дапаможа ў адзін клік знайсці памылкі і адбракоўкі, зрабіць ваш тэкст ідэальным.

Другі варыянт — сэрвіс праверкі правапісу «LanguageTool». Ён шматмоўны і можна спраўджваць ня толькі беларускую, але і ангельскую, польскую, нямецкую і гд. Акрамя таго, ёсць зручнае пашырэнне для, бадай, усіх браўзераў, якое будзе вылучаць памылкі нават у тэксце ў Google Docs.

🔴Тарашкевізатары — пішам па запавету Тарашкевіча

Вы мусіце ведаць, што нашая мова мае два правапісы, у шырэйшым сэнсе дзьве моўных нормы — «наркамаўка» (афіцыйная) і «тарашкевіца» (клясічная) — гэта традыцыйны беларускі правапіс у сучасным разуменьні. А пісаць тарашкевіцай даволі лёгка й у гэтым вам (і нам вядома) дапамогуць два сэрвісы-канвэртары ў тарашкевіцу:

— Тарашкевізатар ад GooseOb
— Тарашкевізатар ад BALTOSLAV

Ужо сёньня можна паставіць сябе ў пляны крыху патрэнавацца пісаць клясычным правапісам. Ну й уважліва пачытаць артыкулы @radiosvaboda, якія пішуць менавіта тарашкевіцай.

🔴Supakojsia і łupі łacіnkaj

Čym dalej — tym cіkaviej, praŭda? Dyk voś biełaruskaja mova maje napіsańnie na troch ałfavіtach і adzіn z іch heta łacіnka.

І heta, biez žartaŭ, adzіn z našych nacyjanalnych skarbaŭ. Akramia pryhažości napіsańnia, łacіnka dla kožnaha biełarusa maje і praktyčnaje značeńnie — vyvučyŭšy łacіnku vy aŭtamatyčna atrymoŭvajecie bust x10 da razumieńnia pa mienšaj miery polskaj і češskaj movaŭ.

U hetym nam znoŭ ža dapamohuć artykuły і servіsy raspracavanyja biełarusamі dla biełarusaŭ:

— Zručny anłajn-łacіnіzatar
— Łacіnіzatar dla macOS, і, kali b u nas byŭ «vybar redakcyі» cі «dadatak tydnia», to my b addali hetuju ŭznaharodu mienavіta za hetaje pašyreńnie, bo adnoj knopkaj vy možacie pierjetvaryć tekst kіrylicaj u tekst łacіnkaj — padrabiazna jak ustalavać my raspaviali tut.

А вось тут ёсць падрабязны артыкул, як чытаць і пісаць лацінкай. Таксама можам параіць пачытаць артыкулы @nashaniva, у якіх ёсць версія сайту на беларускай лацінцы — nashaniva.com/be_latn/.

🔴 Арабіца — сродак зашыфраванай камунікацыі для беларускіх партызан?

А сапраўды, чаму б не? Так, яно працуе не ідэальна, АЛЕ… што мы тут напісалі без канвэртару ці валоданьня арабскай + беларускай мовай не зразумее аніводны — طُط نَپِصَنَ ژِوَ بَلَرُث! رَدَقࢯَِِ مَطُلقَ دَپَمَژِ ژَدَاَ وَم پرَِمنِح وِحُدنِح.

Таму ў нас ёсць два сервісы, з дапамогай якіх мы можам канвертаваць кірыліцу на арабіцу і наадварот:

1. Канвэртар на беларускую арабіцу на GitHub. Ён працуе ў два бакі, што вельмі зручна, але як ужо казалі не ідэальна.

2. Arabica.space — таксама канвэртар на арбіцу, але толькі ў адзін бок.

Ну, а цяпер бонус, вось, што мы напісалі беларускай арабіцай: Жыве Беларусь! Рэдакцыя МатолькаДапамажы жадае вам прыемных выходных.

P.s. Вучыце, выкарыстоўвайце й pašyrajcie biełaruskuju movu ва ўсіх مَژلِوِح پرَوَپِصَح.

@motolkohelp